الاشاعات والحرية والتضليل ,,,,,

امبارح بالصدفه لقيت موضوع متشير من على منتدى عمرو خالد بيقول ان عمرو حمزاوى يهودى من طائفة مش عارف ايه والدليل انه لابس اسوره فى ايده مش عارف لونها ايه !!!!

الصراحه انا صعقت لما قريت الكلام ده يعنى بالبساطه دى بقينا نتهم الناس وبنساهم ونساعد فى ترويج الاشاعات طيب قبل كده كنا بنساعد فى ترويج بعض الكلام والتجريح فى البعض بصور اخرى لكن المره دى وصلت لحد التكفير

هقول لحضراتكم بعض الامثله على تشويه الصور والادعاء على الناس بالباطل ومساهمة النشر الغير مسؤول فى التأثير على البسطاء 

 

1- الشهيد خالد سعيد شهيد الاسكندرية اللى اتقتل علشان خاطر فيديو نشره على اليوتيوب بيدين فيه احد ضباط الشرطه لمتاجرته فى المخدرات ,,,, قتلوه ثو وضعوا لفافة بانجو فى حلقه ثم قاموا بعمل حملة تشويه بانه مسجل خطر ومتعاطى للمخدرات وسلوكه مشبوه وصدق البعض هذا الكلام وساهم فى نشره الكثيرون مثلما يحدث الان

2- د- محمد البرادعى كل ذنبه انه عاد الى مصر فى بداية العام الماضى واعلن عن نيته فى الترشح للانتخابات بشرط ان يتم تعديل مواد الدستور الخاصه بالترشح للرئاسه اللى هما الماده 76 الخاصة بشروط الترشيح والماده 77 الخاصه بالمده وتحجيمها الى مدتين فقط والماده 88 الخاصه بالاشراف القضائى واللى اتغيروا الوقتى زى ماطلب

بالمقابل تم عمل هجمة شرسه فى وسائل الاعلام الحكومية على البرادعى
واتهامه اولا بالعماله لامريكا وانه ساهم فى دخولها العراق وبان ابنته متزوجه من مسيحى وان زوجته غير مصريه وحدث ايضا نفس الكلام وتم نشر هذه الخزعبلات على النت زى اللى حاصل برضه الوقتى وتم تشويه صورة الراجل رغم ان كل ذلك كذب وافتراء 

 

3- وائل غنيم ادمن صفحة كلنا خالد سعيد بعد الحلقه بتاعته مع منى الشاذلى غيرت توجهات الكثير من الناس وجعلتهم مع الثوره ظهرت نفس التشويهات الكوميديه اللى تقريبا اتقالت فى المقاله اللى اتكتبت على عمرو حمزاوى
وائل غنيم ماسونى لانه لابس حظاظه مش عارف شكلها ايه
والشعار اللى على التيشرت شعار الماسونيه على الرغم انه شعار ماركة التيشيرت البولو اللى هو لابسه 

 

وطبعا برضه كتير من البسطاء صدقوا الكلام ونشروه وساعدوا على انتشار هذه الشائعات

وبعد كل ده نرجع تانى ونقع فى نفس الفخ بس المره دى مش اتهامات بالخيانه او العماله او بيع القضيه
لأ المره دى اتهامات بالكفر ياترى هنوصل لحد فين ؟؟

طبعا انا عارف ومقدر جرعة الحرية الضخمه اللى تعاطيناها بعد الثوره واظاهر انها كانت جرعة فعلا زائده عن الحد لدرجة انها عملت اضرار وآثار جانبيه كتير جدااا

كلنا كنا بنطالب بالحريه ومستنيينها بس قبل ما نطالب بيها هل احنا عارفين يعنى ايه حريه ؟؟ عارفين ضوابط التعاطى مع الحريه دى ؟؟ عارفين يعنى ايه الحريه المسؤوله ؟؟ الحريه اللى بتحتم عليا انى احترم الناس الاول اللى بيسمعونى او بقروا كلامى ؟؟

الحريه المسؤوله هى اللى بتحتم عليا انى اتأكد من اى خبر قبل ما اكتبه او انقله والنقل هنا زيه زى الكتابه او يمكن يكون اخطر لأن اللى بينقل او بيساعد فى نشر او بلغة الفيس بوك بيعمل شير ممكن يساهم فى تأكيد الادعاءات دى للالاف و غالبا بيكون انسان برىء ماعندوش غرض قرأ مقال واتأثر بيه وصدقه لكن ماعندوش القدره للتفريق بين الغث والسمين مايعرفش الخفايا اللى اتنشر عشانها الكلام ده لكن بالتأكيد ده مابيعفيهوش من المسؤوليه على الاطلاق لا اخلاقيا ولا دينيا

احنا داخلين على مرحله جديده اساسها الحريه والديمقراطيه واحنا مطالبين نعرف كويس يعنى ايه حريه ونعرف حدودها وضوابطها ونحترم بعض مش علشان فلان مختلف معايا فكريا يبقى اشوه صورته او اكفره زى ماحصل والا اذا كنا مش هنعرف نتعامل بالحريه بلاها حريه ونرجع تانى زى ماكنا احسن ونقول لمبارك احنا اسفين احنا مانستاهلش اصلا الحرية دى

ارجوا من كل واحد شاف الكلام ده انه يفكر فيه شويه ويدى لنفسه فرصه يتأمل الاوضاع اللى احنا فيها واللى لسه داخلين عليها

ارجوا انه قبل ماينقل او يكتب كلمة يعرف انه هيتحاسب عليها ( وما يلفظ من قول الا ولديه رقيب عتيد ) لأن الكلمة دى ممكن تغتال شخص معنويا وممكن تتسبب كمان فى اغتياله جسمانيا

كلنا عارفين الصحف او النشرات الصفرا اللى بتتوزع فى الشوارع والباصات والقطارات وكتير مننا بيشتريها على الرغم انه ممكن يكون عارف ان اللى فيها كذب ياريت مانعملش زيهم

ياريت لما نحب نقرا لحد نقرا لناس موثوق فيها ناس بتحترم عقولنا ولاءها لقرائها وعندها ضوابط اخلاقيه ودينيه تمنعها من تضليل الناس ونحاول نعرف الفروق بين كل كاتب ونحاول نقرا مابين السطور واكيد ساعتها هنفهم هل الكاتب ده كاتب من منطلق ضميره ولا عنده اسباب خفيه بيكتب علشانها

ياريـــــــــــــــــت نحكم ضمايرنا ومنساهمش فى تضليل الناس

ونفتكر ان اللى عامل المنتدى ده هو صاحب مبادرة شير فى الخيـــــــر

ياريت نشير فى الخير

اللَّهُمَّ انى أَعُوذُ بِكَ أَنْ أَضِلَّ أَوْ أُضَلَّ أَوْ أَزِلَّ أَوْ أُزَلَّ أَوْ أَظْلِمَ أَوْ أُظْلَمَ أَوْ أَجْهَلَ أَوْ يُجْهَلَ عَلَيَّ

صدقت يارسول الله