خليك ايجابى وشارك
النهارده اول مره صوتك هيبقى ليه قيمة بجد وأول مره نحس ان بأدينا ممكن نختار من غير مانعرف النتيجة النهائية, النهارده بجد يعتبر اول امتحان من امتحانات الحرية اللى احنا انتزعناها بأدينا .
بس الوقتى دورنا بقى اكتر اهمية, صوتك ده الوقتى بقى فعلا امانه , لازم تفكر كتير قبل ماتقرر هتوديه فين , لان قيمته بقت كبيره قوى .علشان كده اسمحلى اديلك شوية نصايح من ناس بتحبك وبتحب البلد دى .
ماتسمحش لحد انه يفرض عليك رأيه بأى حجه او طريقة. ماتديش لحد فرصه انه يبقى وصى عليك. كل اللى يقولك قول نعم قوله ليه؟؟. وكل اللى يقولك قول لا قوله لأ ليه؟؟. انت راجل بتفهم وواعى اسمع كل الاراء وكون فكرتك انت من دماغك وخد قرارك من جواك لأن اللى عاوز يفرض عليك رأيه مش بيفهم احسن منك.
وخد بالك لو قلت نعم انت صح , وبرضه لو قلت لأ انت صح , لأن الأتنين عندهم اسبابهم المنطقية, وماتخافش من اى حد يقولك ان البلد هتخرب لو قلت نعم. او البلد هتخرب لو قلت لأ ,,,,, ده كلام كله غلط البلد مش هتخرب ولا حاجه. ودى ناس بتحاول تعمل فزاعة علشان تتبنى وجهة نظرهم وخلاص .
وبرضه ماتسمعش لأى حد يقولك لو قلت نعم ده واجب دينى.او قلت لأ ده واجب دينى برضه .اللى بيقول كده بيضحك على نفسه قبل مايكون بيضحك عليك. الواجب فعلا انك تشارك سواء بنعم او بلا . لو كونت رأيك واخدت قرارك انزل قوله بكل حريه. لو لسه ما اخدتش قرارك حاول تفهم كل الاراء وتكون رأيك. انا شخصيا اخدت قرارى خلاص. وهنزل اقوله بس ماتفرضش رأيك على حد. وماتصادرش رأى حد . واحترم كل الاراء وتقبل نتيجة الاستفتاء النهائية لو كانت عكس ارادتك .هى دى الديمقراطية اللى كنا بنحلم بيها وان شاء الله هنحققها .
ليست هناك تعليقات:
إرسال تعليق